SAHAR

انسداد دہشت گردی عدالت نے نو مئی کو تھانہ شادمان جلانے کے مقدمے میں رہنما تحریک انصاف شاہ محمود قریشی پر فرد جرم عائد کر دی۔

سحرنیوز/پاکستان: کوٹ لکھپت جیل لاہور میں انسداد دہشت گردی عدالت لاہور کے جج خالد ارشد نے کیس کی سماعت کی۔ پی ٹی آئی رہنما شاہ محمود قریشی کو کوٹ لکھپت جیل میں پیش کیا گیا۔ عدالت نے شاہ محمود قریشی پر فرد جرم عائد کر دی جبکہ رہنما پی ٹی آئی نے صحت جرم سے انکار کیا۔ عدالت نے آئندہ سماعت پر گواہان کو طلب کرتے ہوئے سماعت بائیس جولائی تک ملتوی کر دی۔
واضح رہے کہ شاہ محمود قریشی کو آج صبح انتہائی سخت سکیورٹی میں اڈیالہ جیل سے لاہور منتقل کیا گیا تھا۔ یاد رہے کہ شاہ محمود قریشی پر نو مئی کو تھانہ شادمان جلاؤ گھیراو سمیت دیگر مقدمات درج ہیں، رہنما پی ٹی آئی کو آج فرد جرم کی کارروائی کیلئے طلب کیا گیا تھا۔