کراچی: پارا چنار واقعے کے خلاف احتجاجی مظاہرے
پاکستان کے سب سے بڑے شہر کراچی میں پاراچنار واقعے کے خلاف احتجاجی مظاہرے جاری ہیں۔
سحرنیوز/پاکستان: پاکستانی میڈیا کے مطابق کراچی کے 13 مقامات پر پاراچنار واقعے کے خلاف احتجاجی مظاہرے ہو رہے ہیں جس کی وجہ سے متعدد سڑکیں بند ہیں۔
گلستان جوہر کامران چورنگی پر دھرنا جاری ہے جس کی وجہ سے ٹریفک کو موسمیات سے یونیورسٹی روڈ کی طرف بھیجا جا رہا ہے۔ سرجانی شمس الدین عظیمی روڈ، نواب صادق خان روڈ ناظم آباد نمبر ایک پر دھرنا جاری ہے۔ شاہراہ پاکستان پر انچولی کے مقام پر بھی دھرنا ہورہا ہے جس کی وجہ سے ٹریفک کو واٹر پمپ سے گلبرگ چورنگی بھیجا جا رہا ہے۔ شاہراہ فیصل اسٹارگیٹ کے قریب بھی دھرنا جاری ہے جس کے باعث کارساز سے ڈرگ روڈکے دونوں روڈ پر ٹریفک کا دباؤ ہے۔ مین نیشنل ہائی وے ٹاؤن شپ کے سامنے بھی احتجاجی مظاہرہ ہو رہا ہے ۔ اس کے علاوہ ایم اے جناح روڈ نمائش چورنگی، ابوالحسن اصفہانی روڈ پر عباس ٹاؤن، یونیورسٹی روڈ پر سفاری پارک کے قریب اور نارتھ ناظم آباد فائیو اسٹار چورنگی پر بھی دھرنا ہورہا ہے۔ نیشنل ہائی وے ملیر 15 برج کے قریب اور کورنگی ڈھائی نمبر ،جمشید روڈ پر بھی احتجاجی مظاہروں کا سلسلہ جاری ہے۔
یاد رہے کہ گرینڈ امن جرگہ فریقین سے مذاکرات مکمل کرنے کے باوجود اب تک کسی حتمی فیصلے تک نہ پہنچ سکا، راستوں کی بندش سے علاقے میں ادویات نہ پہنچنے کے باعث پاراچنار کے اسپتالوں سے مسلسل اموات کی خبریں آرہی ہیں جبکہ لوگ فاقہ کشی پر مجبور ہیں۔
