پی ٹی آئی کے کارکنان کی ضمانت مسترد؛ اسلام آباد کی انسداد دہشت گردی کی خصوصی عدالت
اسلام آباد کی انسداد دہشت گردی کی خصوصی عدالت نے پاکستان تحریک انصاف (پی ٹی آئی) کے چھبیس نومبر کے احتجاج پر پی ٹی آئي کے چھیاسی ورکرز کی ضمانت کی درخواستیں مسترد کر دیں۔
سحرنیوز/پاکستان: ڈان نیوز کے مطابق وفاقی دارالحکومت اسلام آباد میں قائم انسداد دہشت گردی کی خصوصی عدالت کے جج ابوالحسنات محمد ذوالقرنین نے پی ٹی آئی کے چھیاسی ورکرز کی ضمانت کی درخواستوں پر محفوظ کیا گیا فیصلہ سنایا۔عدالت کے جج نے وکلائے طرفین کے دلائل سننے کے بعد اپنا فیصلہ سناتے ہوئے چھیاسی ملزمان کی ضمانت کی درخواستیں مسترد کر دیں۔
اے ٹی سی نے سماعت کے بعد ناجائز اسلحہ کیس میں 6 ملزمان کی ضمانت کی درخواستیں منظور کرلیں، اور ملزمان کو 5 ہزار روپے کے مچلکے جمع کروانے کی ہدایت کردی۔ عدالت کی جانب سے فریقین کے دلائل مکمل ہونے پر فیصلہ محفوظ کیا گیا تھا۔پی ٹی آئی کے کارکنوں کے خلاف چھبیس نومبر دوہزار چوبیس کو اسلام آباد میں پرتشدد احتجاج کے بعد تھانہ ترنول اور کوہسار میں مقدمات درج کیے گئے تھے۔
