SAHAR

روس کے وزیرخارجہ سرگئی لاوروف نے کہا کہ پاکستان اورہندوستان کے شنگھائی تعاون تنظیم کے رکن بننے کی صورت میں معیشت اورتوانائی کے منصوبے زیادہ مفید ہوجائیں گے

روسی وزیر خارجہ سرگئی لاوروف نے منگل کے دن ماسکو میں بین الاقوامی تعلقات کے سرکاری ادارے کے اساتذہ اور طلبا و طالبات کے اجتماع سے کہا کہ خطے میں امن اور استحکام شنگھائی تعاون تنظیم کی ترجیح ہے۔

سرگئی لاوروف کا مزید کہنا تھا کہ اگر پاکستان اور ہندوستان کو اس تنظیم کی مکمل رکنیت حاصل ہوجائے تو معیشت اور توانائی کے منصوبے زیادہ کارگر ہو جائیں گے۔

 واضح رہے کہ شنگھائی تعاون تنظیم پندرہ جون سنہ دو ہزارایک میں قزاقستان، چین، روس، تاجیکستان، اورازبکستان کی شرکت سے وجود میں آئی تھی۔

 اس وقت ایران، افغانستان، ہندوستان، پاکستان اورمنگولیا اس تنظیم میں مبصرکی حیثیت رکھتے ہیں جبکہ بیلاروس، ترکی اور سری لنکا اس تنظیم کے مذاکراتی شریک شمار ہوتے ہیں۔

پاکستان اور ہندوستان نے ستمبر دو ہزار چودہ میں باضابطہ طور پراس تنظیم کی مکمل رکنیت کے لئے درخواست دی تھی۔ اسلامی جمہوریہ ایران بھی اس تنظیم کی مکمل رکنیت حاصل کرنا چاہتا ہے۔