نیویارک: فائرنگ سے ایک ہلاک 6 زخمی
امریکی شہرنیویارک کے برونکس لبنان اسپتال میں سابق ملازم کی فائرنگ سے ایک شخص ہلاک جبکہ 3 ڈاکٹرز سمیت 6 افراد زخمی ہوگئے۔
غیر ملکی خبر رساں ادارے کے مطابق امریکی شہرنیویارک کے برونکس لبنان اسپتال میں ایک شخص لیب کوٹ پہنے داخل ہوا اور فائرنگ شروع کر دی جس کے نتیجے میں 3 ڈاکٹروں سمیت 6 افراد زخمی اور ایک ہلاک ہو گیا تاہم بعض زخمیوں کی حالت تشویشناک بتائی جا رہی ہے۔ فائرنگ کے فوری بعد پولیس کی بھاری نفری جائے وقوع پر پہنچ گئی اور علاقے کا محاصرہ کرلیا۔
نیویارک پولیس حکام کے مطابق حملہ آور ہنری بیلو اسپتال کا سابق ملازم تھا جس نے فائرنگ کے بعد خودکشی کرلی تاہم فائرنگ کی وجہ تاحال معلوم نہیں ہو سکی ہے۔ پولیس کا کہنا ہے کہ شواہد اکٹھے کر کے تحقیقات کا آغاز کر دیا گیا ہے۔
امریکی حکام نے جمعہ کی رات بتایا ہے کہ گزشتہ 15 گھنٹوں کے دوران امریکہ کے مختلف شہروں میں فائرنگ کے واقعات میں 7 افراد ہلاک اور 21 افراد زخمی ہوئے۔
