یورپی پارلیمنٹ میں سعودی عرب کے خلاف قرار داد متفقہ طور پر منظور
یورپی پارلیمنٹ نے ایک قرار داد کے ذریعے انسانیت کے خلاف سعودی حکومت کے مجرمانہ اقدامات کی شدید الفاظ میں مذمت کی ہے۔
مخالف صحافی جمال خاشقجی قتل کیس کے حوالے سے یورپی پارلیمنٹ میں منظور کی جانے والی اس قرارداد میں سعودی عرب کے خلاف پابندیاں عائد کرنے کا بھی مطالبہ کیا گیا ہے۔
یورپی پارلیمنٹ کی قرارداد میں کہا گیا ہے کہ جمال خاشقجی کے قتل میں ملوث تمام افراد کے یورپ میں داخلے پر پابندی اور ان کے اثاثے ضبط کرلیے جائیں۔اس قرارداد میں سعودی ولی عہد کو بھی جمال خاشقجی کے قتل کا ذمہ دار قرار دیتے ہوئے کہا گیا ہے کہ بن سلمان کی اطلاع میں لائے بغیر سعودی انٹیلی جینس ایسا کوئی بھی اقدام نہیں کرسکتی۔ اس سے پہلے یورپی پارلیمنٹ کے سربراہ ایٹونیو تاجانی نے بھی جمال خاشقجی کے قتل میں ملوث تمام افراد کے خلاف مقدمہ چلانے کا جانے کا مطالبہ کیا تھا۔
یورپی پارلیمنٹ میں ایک کے مقابلے میں تین سو پچیس ووٹوں سے منظور کی گئی اس قرار داد میں سعودی حکام سے مطالبہ کیا گیا ہے کہ وہ جمال خاشقجی کی لاش کے بارے میں صحیح اطلاعات فراہم کرے کہ اس کو کہاں دفن کیا گیا ہے۔
سعودی حکومت کے مخالف صحافی جمال خاشقجی دو اکتوبر کو ترکی کے شہر استنبول میں واقع سعودی قونصل خانے میں داخل ہونے کے بعد لاپتہ ہوگئے تھے۔عالمی دباؤ کے نتیجے میں اٹھارہ روز کی خاموشی اور تردید کے بعد سعودی حکومت نے اس بات کا اعتراف کیا کہ جمال خاشقجی کو استنبول میں واقع سعودی قونصل خانے میں تلخ کلامی کے بعد قتل کردیا گیا تھا۔
