SAHAR

سی این بی سی ٹیلی ویژن کے مطابق ڈونلڈ ٹرمپ نے کہا ہے کہ اگر چین مثبت اقدامات انجام دے تو ہوسکتا ہے کہ بعض چینی مصنوعات پر عائد ڈیوٹی ختم یا ان کا اطلاق موخر کردیا جائے۔ٹرمپ نے یہ بیان بیجنگ کی جانب سے اس دھمکی کے محض ایک گھنٹے کے بعد دیا ہے جس میں کہا گیا تھا کہ چین اپنی مصنوعات پر درآمداتی ڈیوٹی میں اضافے کے امریکی فیصلے کا مناسب جواب دے گا۔ قابل ذکر ہے کہ امریکی صدر ڈونلڈ ٹرمپ نے جمعرات کی شب غیر متوقع طور پر اعلان کیا تھا کہ چین سے درآمد کی جانے والی تین سو ارب ڈالر کی اشیا پر دس فی صد ڈیوٹی عائد کردی جائے گی۔ٹرمپ نے یہ اعلان امریکی مذاکراتی وفد کے دورہ چین سے واپسی کے محض ایک روز کے بعد کیا تھا۔چین امریکہ کا سب سے بڑا تجارتی شریک شمار ہوتا ہے لیکن صدر ٹرمپ نے چینی مصنوعات پر درآمداتی ڈیوٹی عائد کرکے بینجنگ کے خلاف تجارتی جنگ شروع کر رکھی ہے۔