SAHAR

نیوز ایجنسی رائٹرز کے مطابق امریکی وزارت خارجہ کے ایک عہدیدار نے کہا ہے کہ انکے ملک کی سرکردگی میں قائم فوجی اتحاد کی حمایت کے حوالے سے عراقی حکومت نے جو رویہ اختیار کر رکھا ہے وہ ہمارے لیے بہت مایوس کن ہے۔

امریکی عہدیدار کا یہ بیان ایسے وقت میں سامنے آیا ہے جب عراق میں قائم التاجی نامی امریکی فوجی اڈے پر گیارہ مارچ کو ہونے والے راکٹ حملوں میں تین امریکی اور برطانوی فوجی ہلاک اور بارہ زخمی ہوگئے تھے۔ 

عراقی حکومت نے کہا ہے کہ وہ اس واقعے کی مکمل تحقیقات کر رہی ہے اور اس میں ملوث افراد کو قانون کے مطابق سزا دی جائے گی۔ 

حکومت عراق کے واضح موقف کو نظر انداز کرتے ہوئے امریکی وزیر خارجہ مائیک پومپیو نے گزشتہ پیر کو دھمکی دی تھی کہ امریکہ عراق میں اپنے فوجی اڈوں پر حملوں کا جواب دے گا۔

بعض مبصرین کا خیال ہے کہ امریکہ عراق سے فوجی انخلا کے عوامی مطالبات کے پیش نظر، حکومت عراق پر دباؤ ڈالنے کے لیے اوچھے ہتھکنڈے استعمال کر رہا ہے تاکہ اسے عوامی مطالبے کی تکمیل سے باز رکھا جا سکے۔