یورپ کے خلاف روس کی بڑی چال
روس نے یورپ کو گیس سپلائی کرنے والی مرکزی گیس پائپ لائن سے گیس کی سپلائی ایک بار پھر بند کر دی ہے جس کے بعد توانائی کے سنگین بحران سے گزرنے والے یورپ کی تشویش بڑھ گئی ہے۔
سحر نیوز/ دنیا: توانائی بحران کے باعث یورپ کے امیر ممالک میں بھی کساد بازاری کا خدشہ پیدا ہو گیا ہے اور گیس کی سپلائی بند ہونے کا موضوع یورپی ممالک کو بے چین کر رہا ہے۔
نارڈ اسٹریم- 1 سے گیس کی سپلائی بدھ سے 3 ستمبر تک بند رہے گی۔ بحیرہ بالٹک کے راستے جرمنی کو گیس کی سپلائی بھی روک دی گئی ہے۔
یورپی ممالک کو خدشہ ہے کہ روس گیس کی سپلائی طویل عرصے تک روک سکتا ہے کیونکہ اس وقت یورپ اور روس کے درمیان جنگ جیسی صورتحال ہے۔
یوکرین کے معاملے پر دونوں فریق آمنے سامنے ہیں۔ یورپ کا خیال ہے کہ یوکرین جنگ کی وجہ سے روس پر عائد پابندیوں کے جواب میں ماسکو گیس کی سپلائی میں کمی کر سکتا ہے اور اس کا کہنا ہے کہ صدر پوتین گیس کو بطور ہتھیار استعمال کرنے کی کوشش کر رہے ہیں تاہم ماسکو حکومت اس الزام کو مسترد کرتی ہے۔
گیس بحران کے باعث یورپ میں گیس کی قیمتوں میں چار گنا سے زائد اضافہ ہو گیا ہے جس کے باعث چیزوں کی قیمتیں بے قابو ہوتی جا رہی ہیں۔
اس سے قبل بھی روس نے گیس پائپ لائن کی مرمت کے باعث دس روز تک گیس کی سپلائی بند کر دی تھی جس کے بعد سپلائی بحال کر دی گئی تاہم دو ہفتے سے بھی کم عرصہ گزرا ہے کہ روس نے ایک بار پھر کہا ہے کہ مرمت کی وجہ سے گیس کی سپلائی بند کر دی گئی ہے۔
