برطانیہ، اسٹریپٹوکوکس اے کے انفیکشن سے درجنوں اموات
برطانیہ میں اب تک درجنوں شہری ایک جراثیمی انفیکشن کی وجہ سے موت کا شکار ہوئے ہیں۔
سحر نیوز/ دنیا: برطانوی ہیلتھ سیکورٹی کے ادارے نے اعلان کیا ہے کہ یہ ہلاکتیں جن کی تعداد ایک سو بائیس بتائی گئی ہے، اسٹریپٹوکوکس اے بیکٹیریا کے نتیجے میں ہوئی ہیں۔ ہلاک ہونے والوں میں سے تیس کی عمر اٹھارہ سال سے کم بتائی جا رہی ہے۔
رپورٹ کے مطابق، اسٹریپٹوکوکس اے بیکٹیریا نے گذشتہ ایک ہفتے کے دوران چار سے زائد بچوں کی بھی جان لے لی ہے۔
قابل ذکر ہے کہ اسٹریپٹوکوکس اے بیکٹیریا غلاظت اور نجاست کو براہ راست چھونے سے پھیلتی ہے اور اس کے علائم پہلے مرحلے میں بخار اور گلے میں درد کی شکل میں سامنے آتے ہیں ۔ اگر اینٹی بایوٹک سے اس کا علاج نہ ہو تو انفیکشن خون میں داخل اور جان لیوا بھی ہوسکتا ہے۔
برطانیہ کے محکمہ صحت کے حکام نے مزید بتایا کہ گزشتہ تین مہینے کے دوران اسکارلیٹ بخار کے تقریبا چونتیس ہزار معاملات بھی سامنے آئے ہیں ۔ یہ ایسی حالت میں ہے کہ اینٹی بایوٹک، بالخصوص پینی سلین کی قلت کے نتیجے میں رواں سال کے دوران درجنوں برطانوی بچے بھی موت کے منہ میں چلے گئے ہیں۔
