SAHAR

اقوام متحدہ نے امریکی یونیورسٹیوں میں فلسطین کی حمایت میں جاری تحریک پراپنے ردعمل میں کہا ہے کہ ادارے کے سکریٹری جنرل غزہ کے مظلوم عوام کی حمایت میں جاری امریکی طلبا کی پرامن تحریک کی حمایت کرتے ہيں-

سحرنیوز/ دنیا: اقوام متحدہ کے سکریٹری جنرل کے ترجمان اسٹیفن دوجاریک نے کہا ہے کہ سکریٹری جنرل انٹونیو گوترش امریکا سمیت پوری دنیا میں آزادی بیان کے سخت حامی ہیں اور وہ عوام کے پرامن احتجاج کے حق کی حمایت کرتے ہیں- اقوام متحدہ کے ترجمان نے کہا ہے کہ اس ادارے نے اعلان کررکھا ہے کہ اس بات کا اطمینان حاصل کرنا ضروری ہے کہ طلبا کی یہ تحریک تشدد کی شکل اختیارنہ کرے، اور ہم نازک دور سے گذر رہے ہيں-

ان کا کہنا تھا کہ امریکی یونیورسٹیوں کے سربراہوں کو اس وقت شدید چیلنجوں کا سامنا ہے-غزہ کے عوام کی حمایت میں اور صیہونی حکومت کے لئے امریکی انتظامیہ کی پالیسی کے خلاف اس بار امریکی یونیورسٹیوں کے طلبا نے تحریک شروع کردی ہے جو پورے امریکا کی یونیورسٹیوں میں پھیل گئي ہے-