SAHAR

اقوام متحدہ نے مقبوضہ غرب اردن پر غاصب صیہونی حکومت کے حملوں کو 2000 کے عشرے کے اوائل سے اب تک کے طولانی مدت ترین حملے قرار دیتے ہوئے تشویش ظاہر کی ہے

سحر نیوز/ عالم اسلام:  ارنا کے مطابق اقوام متحدہ کے ترجمان اسٹیفن دوجاریک نے جمعے  کو صحافیوں سے گفتگو میں کہا کہ انسانی حقوق کے امور میں  ہمارا کوآرڈینیشن آفس غرب اردن کی صورتحال پر نظر رکھے ہوئے ہے۔ انھوں نے کہا کہ غرب اردن کے مختلف علاقوں پر اسرائیل کے طولانی مدت سے جاری حملوں پر ہمیں گہری تشویش ہے۔ اسٹیفن دوجاریک نے انسانی حقوق کے امور میں اقوام متحدہ کے کوآرڈینیشن آفس اوچا (OCHA)     کے  ڈیٹا کا حوالہ دیتے ہوئے کہا کہ غرب اردن میں اسرائیلی فوجیوں کے حملوں کے ساتھ ہی آباد کاروں کے تشدد کا سلسلہ بھی جاری ہے۔

اسٹیفن دوجاریک نے بتایا کہ اوچا نے  11 فروری سے 17 فروری کے درمیان صیہونی آباد کاروں  کے  34 حملوں نوٹ کئے ہیں جس سے ظاہر ہوتا ہے  کہ آباد کاروں نے اوسطا روزانہ 5 حملے کئے ہیں ۔   اقوام متحدہ کے ترجمان نے کہا کہ ایک واقعے میں آباد کاروں نے غرب اردن کے علاقے طولکرم میں فلسطینی کاشت کاروں کے آب پاشی کے پائپ کاٹ دیئے۔  انھوں نے بتایا کہ گزشتہ برس اسرائیلی آباد کاروں کے حملوں کے نتیجے میں بیت لحم کے المنیہ گاؤں کے قریب ایک علاقے کے 40 فلسطینیوں کو اپنا گھربار چھوڑنا پڑا ہے۔