انڈونیشیا میں دردناک حادثہ، جیل میں لگی آگ، درجنوں جاں بحق
Sep ۰۸, ۲۰۲۱ ۱۱:۲۰ Asia/Tehran
انڈونیشیا کے مغربی صوبے بانتن میں ایک جیل میں آگ لگنے سے کم سے کم 41 لوگوں کی موت ہوگئی اور 70 سے زیادہ لوگ زخمی ہوئے ہیں۔
سرکاری ترجمان اور میڈیا رپورٹوں کے مطابق، منگل اور بدھ کی درمیانی شب مقامی وقت کے مطابق 1 سے 2 بجے کے درمیان تنجیرنگ جیل کے سی بلاک میں آگ لگ گئی۔ رپورٹ ملنے تک آگ پر قابو پا لیا گیا تھا اور جیل کو خالی کرانے کی کوشش جاری تھی۔
یہ اطلاع قانون و انسانی حقوق کی وزارت کے ایک شعبے کی ترجمان ریکا اپریانتی نے دی۔
فائر ڈپارٹمنٹ نے خراب الکٹریکل وایرنگ کو آگ لگنے کا ممکنہ سبب قرار دیا ہے۔
الجزیرہ کے مطابق، 70 زخمی قیدیوں میں 8 کی حالت تشویشناک ہے جنکا 90 فیصدی جسم جھلس چکا ہے، جس سے مرنے والوں کی تعداد بڑھ سکتی ہے۔
قابل ذکر ہے کہ جس جیل میں آگ لگی ہے اس میں گنجائش سے زیادہ قیدیوں کو رکھا گیا ہے۔
