SAHAR

ایران کے وزیر دفاع نے ساری دنیا پر زور دیا ہے کہ وہ امریکی دہشت گردی کے مقابلے میں اپنی ذمہ داریاں پوری کرے

بریگیڈیئر جنرل امیر حاتمی کا کہنا تھا کہ جنرل قاسم سلیمانی کو دہشت گردانہ حملے میں شہید کرنے کے امریکی اقدام کے سامنے پوری دنیا ذمہ دار ہے اور اسے امریکہ کے اس مجرمانہ اقدام کے بارے میں اپنی ذمہ داریوں کو پورا کرنا چاہیے۔ انہوں نے کہا کہ ایک اعلی فوجی عہدیدار کو ہمسایہ ملک کے سرکاری دورے کے موقع پر اس کے میزبانوں کے ساتھ قتل کرنے کا حکم دینا عالمی قوانین کے منافی ہے اور تاریخ میں ایسے گھناونے جرم کا اس سے پہلے کبھی مشاہدہ نہیں کیا گیا۔ ایران کے وزیر دفاع نے یہ بات زور دے کر کہی کہ اگر اس طرح کے متکبرانہ اور مجرمانہ فعل کا ٹھوس جواب نہ دیا گیا تو یہ مغرور دشمن آئندہ بھی ایسے جرم کا ارتکاب کرنے سے باز نہیں آئے گا۔