SAHAR

واضح رہے یمن کے یہ بے گناہ شہری چھبیس مارچ سے سعودی اتحاد کے حملوں اور ان کی جانب سے یمن کے محاصرے کی بناپر شہید ہوئے ہیں۔ سعودی عرب، امارات اور بحرین نے چھبیس مارچ سے سابق اور مفرور صدر عبدربہ منصورہادی کو دوبارہ اقتدار میں واپس لانے کے لئے دیگر عرب ملکوں کے ساتھ اتحاد کرکے یمن پر تباہ کن حملے شروع کئے تھے اور ان حملوں میں اس غریب عرب ملک کی بنیادی تنصیبات کو نشانہ بنایا جارہا ہے۔

آل سعود اور اسکے اتحاد کے وحشیانہ حملوں کے باوجود یمن کی فورسز اور عوام نے مثالی استقامت کا ثبوت دیا اور تمام مشکلات کے باوجود عرب حکام کی جارحیت کے مقابل ثابت قدمی سے کام لیتے ہوئے یہ ثابت کردیا کہ وہ اپنی سرزمین کا دفاع کرنے کی طاقت رکھتے ہیں۔ صافر فوجی اڈے پرگذشتہ روز کا حملہ اسی طاقت کا نمونہ ہے۔ دراصل سعودی عرب کی سربراہی میں عرب اتحاد کو اب تک یمن میں کوئي ھدف حاصل نہیں ہوسکا ہے اورنہ ہی وہ سابق اورمفرورصدرکو واپس اقتدار میں لانے میں ہی کامیاب ہوا ہے بلکہ تحریک انصاراللہ پرجو یمن کے شہروں میں نظم و نسق سنبھالے ہوئے ہے حملوں سے الٹا نتیجہ حاصل ہوا ہے اور یمن کے شہر یکے بعد دیگرے تحریک انصاراللہ اور فوج کے قبضے میں آتے جارہے ہیں۔

سعودی عرب نے یمن پر اپنی جارحیت کے دوران یمنی عوام کے خلاف بے شمار انسانیت سوز کاروائياں انجام دی ہیں جن پر یمن اور علاقے کے عوام نیز عالمی برادری نے شدید برہمی کا اظہار کیا ہے اور یہ لوگ دنیا کے مختلف علاقوں میں ہر روز مظاہرے کرکے آل سعود کی توسیع پسندانہ کاروائيوں کی مذمت کررہے ہیں۔ ان مظاہروں کے نتیجے میں آل سعود کو اب سخت حالات کا سامنا ہے۔

 سیاسی مبصرین کا کہنا ہے کہ ان حالات میں آل سعود بعض ہم خیال طاقتوں کی حمایت سے علاقائي اوربین الاقوامی اجلاس کرواکر یمن کے دلدل سے آبرومندانہ طریقے سے نکلنے کی کوشش کررہا ہے لیکن جو چیزمسلم ہے وہ یہ ہے کہ آل سعود کی حکومت کسی بھی صورت میں بحران یمن میں ایک شکست خوردہ حکومت ہے اور یمن کے عوام کے خلاف سعودی عرب کی مجرمانہ کاروائيوں کو محو کرنا کوئي آسان کام نہیں ہوگا۔