ہندوستان، دھماکے سے 6 افراد ہلاک 12 زخمی
بہار میں شہر بھاگلپور کے تاتارپور علاقے میں جمعرات کی رات گئے زور دار دھماکے کے سبب ایک مکان تباہ ہونے سے چھے افراد کی موت ہو گئی اور 12 دیگر زخمی ہو گئے۔
بھاگلپور کے ڈپٹی انسپکٹر جنرل آف پولیس سوجیت کمارکا کہنا ہے کہ کاجولیچک محلے میں ایک تین منزلہ مکان جمعرات کی دیر رات زور دار دھماکے سے منہدم ہو گیا اور اس کے ملبے تلے دب کر کم از کم 6 افراد ہلاک اور 12 افراد زخمی ہو گئے۔
انہوں نے کہا کہ تمام زخمیوں کو بھاگلپور کے صدر اسپتال اور جواہر لال نہرو میڈیکل کالج اسپتال میں داخل کروایا گیا ہے جن میں کئی زخمیوں کی حالت تشویشناک ہے۔
ڈی آئی جی نے بتایا کہ زور دار دھماکے کی وجہ سے منہدم ہونے والے مکان کے ملبے کو صاف کرنے کا کام تیزی سے جاری ہے اور ملبہ ہٹانے کے بعد ہلاکتوں کی تعداد میں اضافہ ہو سکتا ہے۔ اس حادثے میں تباہ شدہ مکان کے قریب دو دیگر مکانات کو بھی نقصان پہنچا ہے۔
ڈپٹی انسپکٹر جنرل آف پولیس نے کہا کہ اس حادثے کی ابتدائی تحقیقات میں مذکورہ مکان میں غیر قانونی دیسی ساختہ بم اور پٹاخے بنانے والا سامان سامنے آیا ہے۔
فورنسک سائنس لیبارٹری (ایف ایس ایل) کی ٹیم نے معاملے کی تحقیقات شروع کر دی ہے۔
