این ڈی اے کو شکست فاش اور انڈیا کا بول بالا ہوگا: کانگریس
کانگریس کے رکن پارلیمنٹ ششی تھرور نے ٹوئٹ کر کے مودی حکومت پر حملہ کرتے ہوئے لکھا کہ این ڈی اے کو شکست فاش ہوگی اور انڈیا کا بول بالا ہوگا۔
سحر نیوز/ ہندوستان: بنگلورو میں گزشتہ روز اپوزیشن جماعتوں کے اجلاس کے دوران اہم فیصلہ لیتے ہوئے کہا گیا کہ ان کے اتحاد کا نام 'انڈیا' (انڈین نیشنل ڈیولپمنٹل انکلوسیوالائنس) ہوگا۔
بی جے پی کے خلاف 26 اپوزیشن جماعتوں کے اتحاد انڈیا (آئی این ڈی آئی اے) کا اعلان کرتے ہوئے کانگریس کے صدر ملکارجن کھڑگے نے منگل کو کہا تھا کہ 26 پارٹیوں نے متحد ہو کر کام کرنے کا عہد کیا ہے۔ انہوں نے کہا کہ ہمارا مقصد اپنے لیے اقتدار حاصل کرنا نہیں ہے۔ ہمارا مقصد ملک میں جمہوریت، سیکولرازم اور سماجی انصاف کا تحفظ ہے۔ آئیے ہم ہندوستان کو ترقی، بہبود اور حقیقی جمہوریت کی راہ پر واپس لے جانے کا عزم کریں۔
انہوں نے مزید کہا کہ آج ہم ایک ساتھ مل کر 11 ریاستوں میں حکومت میں ہیں ۔ بی جے پی کو اکیلے 303 سیٹیں نہیں ملی ہیں۔ وہ اپنے اتحادیوں کے ووٹوں کا استعمال کر کے اقتدار میں آئے اور پھر ان کو کنارے لگا دیا۔
