ہندوستان: اترپردیش میں سڑک حادثہ، درجنوں ہلاک اور زخمی+ ویڈیو
ہندوستان کی ریاست اترپردیش میں پیش آنے والے سڑک حادثے میں درجنوں افراد ہلاک اور زخمی ہو گئے۔
سحرنیوز/ہندوستان: ہندوستانی میڈیا نے خبر دی ہے کہ بدھ کی صبح مقامی وقت کے مطابق ساڑھے چار بجے لکھنؤ آگرہ ہائی وے پر یہ واقعہ پیش آیا جس میں کم از کم اٹھارہ مسافروں کے ہلاک اور تیس سے زائد کے زخمی ہونے کی خبر ہے۔ رپورٹ کے مطابق اناؤ کے گڑھا گاؤں کے قریب ایک ڈبل ڈیکر مسافر بس کو جس وقت پیچھے سے آنے والے دودھ سے بھرے تیز رفتار ٹینکر نے اوور ٹیک کرنے کی کوشش کی، اُس وقت دونوں گاڑیاں ٹکرا گئیں اور نتیجے میں یہ اندوہناک حادثہ پیش آیا۔
بتایا جاتا ہے کہ یہ حادثہ اتنا خوفناک تھا کہ ڈبل ڈیکر بس کئی بار الٹ کر دو حصوں میں بٹ گئی۔ واقعہ کی اطلاع ملتے ہی ڈی ایم اور ایس پی موقع پر پہنچ گئے۔ زخمیوں کو اسپتال لے جایا گیا ہے۔ ہلاک ہونے والوں میں چودہ مرد، تین خواتین اور ایک بچہ شامل ہے۔
