ہندوستان کی سرزمین پر امیر قطر کا پرتپاک استقبال
امیر قطر شیخ تمیم بن حمدآل ثانی منگل کو ہندوستان کے دورے پر نئی دہلی پہنچے جہاں ہندوستانی صدر اور وزیراعظم نے ان کا پرتپاک استقبال کیا۔
سحرنیوز/ہندوستان: ہندوستانی میڈیا ذرائع کے مطابق وزیر اعظم نریندر مودی نے حیدرآباد ہاؤس میں قطر کے امیر شیخ تمیم بن حمد آل ثانی کا گرمجوشی سے استقبال کیا۔ امیر قطر کے اس دورے کے موقع پر ہندوستان اور قطر کے درمیان دوطرفہ گفتگو کے بعد کئی مفاہمت ناموں پر دستخط کیے جائیں گے۔ سوشل میڈیا پلیٹ فارم ایکس پر ایک پوسٹ میں وزارت خارجہ کے ترجمان نے کہا یہ دورہ دونوں ممالک کے درمیان خصوصی ہندوستان-قطر شراکت داری کے لئے ایک نیا سنگ میل ثابت ہوگا۔
اس سے قبل منگل کی صبح قطر کے امیر کا راشٹرپتی بھون میں رسمی استقبال کیا گیا۔ ہندوستانی وزیر اعظم نریندر مودی اور صدر جمہوریہ دروپدی مرمو نے راشٹرپتی بھون میں قطر کے امیر کا خیرمقدم کیا، جہاں انہیں گارڈ آف آنر دیا گیا۔ قطری ریڈ آؤٹ کے مطابق ملاقات کے دوران دونوں ممالک کے درمیان دو طرفہ تعاون کے تعلقات کے علاوہ تازہ ترین علاقائی اور بین الاقوامی پیش رفت پر تبادلہ خیال کیا گیا۔ ملاقات میں وزیر اعظم اور وزیر خارجہ شیخ محمد بن عبدالرحمن بن جاسم الثانی اور ان کے ساتھ آنے والے سرکاری وفد کے کئی سینئر اراکین نے شرکت کی۔
