ہندوستان: رام دیو کے غلط اشتہار پر عدالت کی برہمی
دہلی ہائی کورٹ نے منگل کو یوگا گرو رام دیو کے اُس تبصرہ پر سخت اعتراض کیا جس میں انہوں نے ہمدرد کے روح افزا کے لیے شربت جہاد جیسے قابل اعتراض الفاظ استعمال کیئے تھے۔
سحرنیوز/ہندوستان: ہندوستان کے میڈیا ذرائع کے مطابق یوگا گرو بابا رام دیو نے منگل کو دہلی ہائی کورٹ کو مطلع کیا کہ ہمدرد نیشنل فاؤنڈیشن انڈیا کے روح افزا شربت کے خلاف تمام اشتہارات چاہے پرنٹ ہوں یا ویڈیوز، ہٹا دیے جائیں گے۔ جسٹس امت بنسل، ہمدرد فاؤنڈیشن کی عرضی پر سماعت کر رہے تھے، جو رام دیو کی کمپنی پتنجلی فوڈز لمیٹڈ کے خلاف دائر کی گئی ہے۔جسٹس بنسل نے رام دیو کے وکیل سے کہا کہ یہ تبصرہ عدالت کے ضمیر کو جھنجھوڑ تا ہے۔ آپ اپنے موکل سے ہدایت لیں ورنہ ہم سخت حکم دیں گے۔
عدالت کی اس ہدایت پر پتنجلی نے کہا کہ وہ رام دیو کے شربت جہاد کے تبصرے اور اس سے متعلق ویڈیوز اور اشتہارات کو ہٹا لے گی یا تبدیل کر دے گی۔پتنجلی کی طرف سے پیش ہونے والے ایڈوکیٹ راجیو نائر نے کہا کہ وہ کسی مذہب کے خلاف نہیں ہیں اور متنازعہ ویڈیوز اور اشتہارات کو ہٹانے کے لیے تیار ہیں۔ انہوں نے یہ بھی کہا کہ اگر اشتہارات نہ ہٹائے گئے تو ان میں مذہب سے متعلق تمام باتیں ہٹا دی جائیں گی۔
اس ماہ کے اوائل میں، رام دیو نے پتنجلی کے گلاب شربت کی تشہیر کرتے ہوئے دعویٰ کیا تھا کہ ’’ہمدرد کے روح افزا سے حاصل ہونے والی رقم مدرسوں اور مساجد کی تعمیر میں استعمال ہوتی ہے۔ بعد میں رام دیو نے اپنے تبصرہ کا دفاع کرتے ہوئے کہا کہ انہوں نے کسی برانڈ یا فرقہ کا نام نہیں لیا تھا۔
