الیکشن کمیشن کی ہندوستان بھر میں ایس آئی آر کرانے کی تیاری
ہندوستان کی ریاست بہار میں ووٹر لسٹ کی خصوصی گہری نظر ثانی ایس آئی آر پر اپوزیشن پارٹیوں کی جاری ہنگامہ آرائی کے درمیان الیکشن کمیشن نے پورے ملک میں ایس آئی آر کرانے کی تیاری کر لی ہے۔
سحرنیوز/ہندوستان: میڈيا ذرائع سے ملی اطلاع کے مطابق الیکشن کمیشن نے دس ستمبر کو دہلی میں تمام ریاستوں کے چیف الیکٹورل افسروں کی ایک میٹنگ بلائی ہے جس میں اس معاملے پر تفصیلی گفتگو ہوگی۔ میٹنگ میں چیف الیکشن کمشنر گیانیش کمار کے علاوہ تمام ریاستوں کے الیکشن کمشنرز اور دیگر سینئر افسران شامل ہوں گے۔ واضح ہو کہ بہار میں چلائی جانے والی ایس آئی آر مہم ایک سیاسی لڑائی کی شکل اختیار کر چکی ہے۔ آر جے ڈی، کانگریس، سی پی آئی، سی پی ایم، ترنمول کانگریس اور سماجوادی پارٹی سمیت کئی اپوزیشن پارٹیوں نے بڑی تعداد میں ووٹرس کے نام لسٹ سے ہٹانے پر اپنا احتجاج درج کرایا ہے۔ ساتھ ہی الیکشن کمیشن پر کئی سوال بھی اٹھائے ہیں۔ حالانکہ الیکشن کمیشن کسی بھی سوال کا نہ تو واضح جواب دے رہا ہے، اور نہ ہی ووٹر لسٹ میں موجود خامیوں کے بارے میں کوئی وضاحت پیش کی جا رہی ہے۔
