ڈی جی سی اے نے انڈیگو پر لگایا کروڑوں کا جرمانہ
ڈائریکٹوریٹ جنرل آف سول ایوی ایشن (ڈی جی سی اے) نے دسمبر کے پہلے ہفتے میں انڈیگو کی پروازوں میں پڑنے والے خلل کی تحقیقات کے لیے قائم کردہ کمیٹی کی رپورٹ کی بنیاد پر ایئر لائن پر 22.20 کروڑ روپے کا جرمانہ عائد کیا ہے اور ایک افسر کو عہدے سے ہٹانے کی ہدایت دی ہے۔ ایئر لائنز کا کہنا ہے کہ اسے حکم نامہ موصول ہو گیا ہے اور وہ اس کے مطابق اقدامات کرے گی۔
سحرنیوز/ہندوستان: گزشتہ 3 دسمبر سے 5 دسمبر کے درمیان انڈیگو کی 2,507 پروازیں منسوخ ہوئی تھیں اور 1,852 پروازوں میں تاخیر ہوئی تھی۔ اگرچہ اس کے بعد بھی بڑے پیمانے پر خلل جاری رہا، لیکن ڈی جی سی اے نے اپنی کارروائی کے لیے صرف ان تین دنوں کو بنیاد بنایا ہے۔ تحقیقاتی کمیٹی نے 26 دسمبر کو اپنی رپورٹ پیش کی تھی۔
انڈیگو کے چیئرمین وکرم سنگھ مہتا نے کمپنی کے اسٹیک ہولڈرز اور صارفین کے نام جاری پیغام میں کہا ہے کہ کمپنی کا بورڈ آف ڈائریکٹرز اور انتظامیہ ڈی جی سی اے کے حکم کا مکمل نوٹس لے گی اور بروقت مناسب اقدامات کرے گی۔ انہوں نے کہا کہ ایئر لائنز نے اپنے اندرونی عمل کی مضبوطی کا جائزہ لینا بھی شروع کر دیا ہے تاکہ انڈیگو مستقبل میں مزید مضبوط ہو کر ابھرے۔
ہمیں فالو کریں:
Follow us: Facebook, X, instagram, tiktok whatsapp channel
ڈی جی سی اےنے انڈیگو کے سی ای او پیٹر البرز کو تنبیہ کر کے چھوڑ دیا ہے جبکہ چیف آپریٹنگ آفیسر اسیڈور پورکرس کو ونٹر شیڈول اور فلائٹ ڈیوٹی سے متعلق نئے قوانین کے اثرات کا اندازہ لگانے میں ناکامی پر وارننگ جاری کی ہے۔ اس کے ساتھ ہی، کمپنی کے سینئر نائب صدر (آپریشنز کنٹرول سینٹر) جیسن ہرٹر کو موجودہ ذمہ داریوں سےفارغ کرنے اور آئندہ کوئی بھی ذمہ دارانہ عہدہ نہ دینے کا حکم دیا گیا ہے۔ کمپنی کے ڈپٹی چیف آف فلائٹ آپریشنز، ایڈیشنل وائس پریذیڈنٹ (کرو ریسورس مینجمنٹ) اور ڈائریکٹر فلائٹ آپریشنز کو بھی وارننگ جاری کی گئی ہے۔
