ایران پاکستان تعلقات اور تعاون علاقائی سلامتی اور استحکام کے لئے ضروری، بروجردی
ایران کے قومی سلامتی اور خارجہ پالیسی کمیشن کے سربراہ نے کہا ہے کہ مختلف میدانوں میں ایران پاکستان تعاون کا فروغ خطے کی سلامتی اور استحکام میں مدد گار ثابت ہو گا۔
اسلام آباد میں پاکستان کے قومی سلامتی کے مشیر ناصر خان جنجوعہ سے بات چیت کرتے ہوئے قومی سلامتی اور خارجہ پالیسی سے متعلق ایرانی پارلیمانی کمیشن کے سربراہ سید علاء الدین بروجردی نے کہا کہ تہران اسلام آباد تعلقات کے فروغ سے خطے کی سلامتی اور استحکام کو پائیدار بنانے میں مدد ملے گی۔
علاء الدین بروجردی اور ناصر خان جنجوعہ کے درمیان ہونے والی ملاقات میں تہران اسلام آباد تعلقات کے فروغ کے لیے مزید اقدامات کی ضرورت پر زور دیا گیا۔
دونوں عہدیداروں نے علاقے کی تبدیلیوں کی جانب اشارہ کرتے ہوئے ایران اور پاکستان کے درمیان اقتصادی، تجارتی، سیکورٹی اور سرحدی تعاون میں اضافے کو ضروری قرار دیا۔
ایران کے قومی سلامتی اور خارجہ پالیسی کمیشن کے سربراہ اور پاکستان کے وزیراعظم کے مشیر برائے قومی سلامتی نے یہ بات زور دیکر کہی کہ دونوں ملکوں کی سرحدی اور سیکورٹی کمیٹی کا فوری اجلاس بلانے پر بھی اتفاق کیا گیا۔
ایران کی قومی سلامتی اور خارجہ پالیسی کمیشن کے سربراہ سید علاء الدین بروجردی، علاقائی و عالمی مسائل پر تبادلہ خیال اور تہران میں ہونے والی عالمی فلسطین کانفرنس میں شرکت کا دعوت نامہ دینے کی غرض سے بدھ کے روز پاکستان پہنچے تھے۔
پچھلے تین روز کے دوران سید علاءالدین بروجردی نے پاکستان کی قومی اسمبلی کے اسپیکر، سینیٹ کے چیئرمین، مشیر خارجہ اور دفاعی کمیٹی کے سربراہوں سے الگ الگ ملاقات کی اور انہیں فلسطین کانفرنس میں شرکت کی باضابطہ دعوت بھی دی۔
