SAHAR

 تہران میں دفتر خارجہ سے جاری ہونے والے بیان میں کہا گیا ہے کہ اسلامی جمہوریہ ایران دنیا بھر میں جنگوں کے خاتمے اور کورونا کے خلاف مہم  سے متعلق اقوام متحدہ کے سکریٹری جنرل انتونیو گوترس کے بیان کا خیر مقدم کرتا ہے۔ بیان میں آیا ہے کہ چالیس سال سے لاکھوں افغان مہاجرین کی میزبانی کرنے والے پڑوسی ملک کی حیثیت سے اسلامی جمہوریہ ایران، افغانستان کی موجودہ صورتحال کو پوری طرح سمجھتا ہے۔ 

ایران کی وزارت خارجہ نے افغانستان کے تمام مسلح دھڑوں سے بھی اپیل کی ہے کہ وہ ملک گیر جنگ بندی کا جرأت مندانہ فیصلہ کریں اور کورونا وائرس کے مقابلے کے لیے پرامن ماحول فراہم کرکے، افغانستان کی تاریخ  کا نیا باب رقم کریں۔ 

ایران کی وزارت خارجہ کے بیان میں اقوام متحدہ کے سکریٹری جنرل پر زور دیا گیا ہے کہ وہ پوری نیک نیتی کے ساتھ افغانستان میں قیام امن کی کوششوں کو آگے بڑھائیں اور اس بین الافغانی مذاکرات کا راستہ ہموار کرنے کی کوشش کریں۔ 

بیان میں کہا گیا ہے کہ اسلامی جمہوریہ ایران اقوام متحدہ کی نگرانی میں ہر ایسی تجویز اور سیاسی اقدام میں مدد دینے کے لیے تیار ہے جو افغانستان میں جنگ بندی اور امن کے قیام پر منتج ہو۔