SAHAR

ایران کی انجمن ہلال احمر نے نئے کورونا وائرس اومیکرون کے مقابلے کی غرض سے ملک بھر کی سرحدی گزرگاہوں پر خصوصی انتظامات کا اعلان کیا ہے۔

ایران کی جمعیت ہلال احمر کے سربراہ پیرحسین کولیوند نے کہا ہے کہ نئے کورونا وائرس کی روک تھام کے لیے سرحدی گزرگاہوں کی کڑی نگرانی اور لازمی اقدامات عمل میں لائے جارہے ہیں۔ انہوں نے کہا کہ ہم وزارت صحت کے تعاون سے سرحدوں پر آمد و رفت کو پوری طرح کنٹرول کر رہے ہیں تاکہ نیا کورونا وائرس ملک میں داخل نہ ہونے پائے۔

پیرحسین کولیوند نے کہا کہ ایران کی انجمن ہلال احمر اومیکرون کے مقابلے کی غرض سے دیگر ملکوں کی صورتحال اور ان کے اقدامات کا بھی بغور جائزہ لے رہی ہے۔ایران کی انجمن ہلال احمر کے سربراہ نے ایک بار پھر کورونا پروٹوکول پر سختی کے ساتھ عملدرآمد کی ضرورت پر زور دیا۔