حضرت امام رضاع کے روضے کی زیارت کا نیا ریکارڈ
امام رضا علیہ السلام کے روضے کی انتظامی کمیٹی آستان قدس رضوی کے نائب سربراہ نے کہا ہے کہ گذشتہ دس دنوں میں ایک کروڑ بیس لاکھ زائرین نے فرزند رسول ص کے روضے کی زیارت کی ہے۔
آستان قدس رضوی کے نائب سربراہ محمد توکلی نے کہا ہے کہ حضرت امام رضا علیہ السلام کے روضے کے سولہ گیٹوں سے داخل ہونے والوں کو خاص کمپیوٹر سسٹم کے ذریعے گنا جاتا ہے۔ انہوں نے بتایا کہ حاصل شدہ ڈیٹا سے معلوم ہوا ہے کہ ایک کروڑ بیس لاکھ زائرین گذشتہ دس دن میں حرم علی بن موسی الرضا علیہ السلام میں داخل ہوئے ہیں۔
انہوں نے بتایا کہ امام رضا علیہ السلام کے یوم شہادت کے سلسلے میں مشہد مقدس پہنچنے والے زائرین اور تین ہزار ایک سو مذہبی انجمنوں کا تعلق ایران کے علاوہ زیادہ تر پاکستان، افغانستان، ہندوستان اور عراق سے تھا۔
بتایا جا رہا ہے کہ اس سال امام رضا علیہ السلام کے یوم شہادت پر مشہد مقدس پہنچنے والے زائرین کی تعداد نے گذشتہ برسوں کے تمام ریکارڈ توڑ دیئے ہیں۔
