رہبرانقلاب اسلامی کی امام خمینیؒ کے مزار اور گلزار شہداء پر حاضری
رہبر انقلاب اسلامی آیت اللہ العظمی سید علی خامنہ ای نے آج صبح بانی انقلاب اسلامی حضرت امام خمینی (رہ) کے مزار اور گلزار شہداء میں فاتحہ خوانی کی اور انھیں خراج تحسین پیش کیا۔
سحر نیوز/ ایران: عشرۂ فجر، حضرت امام خمینی (رہ) کی تاریخی وطن واپسی اور اسلامی انقلاب کی پرشکوہ کامیابی کی چھیاالیسویں سالگرہ کی آمد کے موقع پر رہبر انقلاب اسلامی آیت اللہ العظمیٰ خامنہ ای جمعرات 30 جنوری کو علی الصبح اسلامی جمہوریہ کے بانی امام خمینی رحمت اللہ علیہ کے مزار اقدس پر پہنچے اور انھوں نے نماز ادا کرکے اور قرآن خوانی کرکے ایرانی قوم کے عظیم الشان رہبر کو خراج عقیدت پیش کیا۔
رہبر انقلاب اسلامی اسی طرح شہید بہشتی، شہید رجائی، شہید باہنر اور 28 جون 1981 کے سانحے میں شہید ہونے والوں کے مزار بھی پہنچے اور خداوند عالم سے ان کے درجات کی بلندی کی دعا کی۔
آيت اللہ العظمیٰ خامنہ ای اس کے بعد بہشت زہرا میں واقع شہداء کے قبرستان "گلزار شہداء" پہنچے اور اسلام ، ایران اور حرم کے دفاع میں اپنی جان کا نذرانہ پیش کرنے والے شہیدوں کی پاکیزہ ارواح کو خراج عقیدت پیش کیا۔
