ایران افغانستان سرحد پر سیکورٹی اقدامات سخت؛ ایران کے وزیر داخلہ
ایران کے وزیر داخلہ نے کہا ہے کہ غیرقانونی نقل و حرکت، منشیات اسمگلنگ اور غیرقانونی شہریوں کی آمد روکنے کے لیے مؤثر اقدامات کا فیصلہ کیا گیا۔
سحرنیوز/ایران: ایران کے وزیر داخلہ اسکندر مومنی نے کہا ہے کہ پارلیمنٹ اور حکومت افغانستان سے ملحقہ مشرقی سرحدوں کو بند کرنے کے لئے ضروری اقدامات اٹھانے کے لیے پرعزم ہیں۔ایران کے وزیر داخلہ نے افغانستان کے ساتھ متصل سرحد کے دورے کے دوران میڈیا سے گفتگو کرتے ہوئے کہا کہ ایران کی جانب سے خراسان رضوی اور جنوبی خراسان میں سرحدی دیوار کی تعمیر کا سلسلہ جاری ہے۔ اب تک اس منصوبے کے تحت ایک سو تیس کلومیٹر کا کام مکمل ہوچکا ہے جبکہ دیگر حصے تیار کرکے سائٹ پر منتقل کیے جاچکے ہیں، جنہیں بنیادی ڈھانچہ مکمل ہونے کے بعد نصب کیا جائے گا۔انہوں نے مزید کہا کہ سرحدوں کو مکمل طور پر بند کرنا نہایت ضروری ہے۔ یہ اقدام سرحدی سیکورٹی کو بہتر بنانے، مجرموں کی نقل و حرکت روکنے، منشیات کی اسمگلنگ اور لوگوں کی غیر قانونی آمد س رفت کو روکنے میں نہایت مثبت کردار ادا کرے گا۔ مومنی نے کہا کہ جن علاقوں میں دیوار مکمل ہوچکی ہے وہاں غیر قانونی نقل و حرکت کو کنٹرول کرنے میں ستر سے اسی فیصد تک کامیابی حاصل ہوئی ہے۔
