SAHAR

عراق کی وزارت پیٹرولیم نے کہا ہے کہ شمالی عراق کے کردستان علاقے نے تیل کی آمدنی کے سلسلے میں ہونے والے معاہدے پر پوری طرح عمل نہیں کیا ہے

عراقی نیوز ایجنسی الرای کی رپورٹ کے مطابق عراق کی وزارت پیٹرولیم کے ترجمان عاصم جہاد نے کہا ہے کہ کردستان نے عراق کی مرکزی حکومت کے ساتھ ہونے والے معاہدے کے بر خلاف، تیل کی پچاس فیصد سے بھی کم آمدنی حکومت کے حوالے کی ہے جس کے باعث مرکزی حکومت کو بجٹ خسارے کا سامنا کرنا پڑ رہا ہے-

 عراق کی وزارت پیٹرولیم کے ترجمان نے اس بات کا ذکر کرتے ہوئے کہ مرکزی حکومت کے ساتھ کردستان علاقے کے مسائل اور اختلافات کوئی نئی بات نہیں ہے، کہا کہ ان اختلافات کو مذاکرات کے ذریعے حل کرنا موجودہ حکومت کے پروگراموں کا حصہ ہے-

 عاصم جہاد کے مطابق بغداد اور اربیل کے درمیان گذشتہ دسمبر میں ہونے والے معاہدے کی بنیاد پر عراق کے قومی بجٹ کا سترہ فیصد کردستان کے لئے مختص کیا جائے گا اور اس کے عوض، کردستان کے تیل کی فروخت سے ہونے والی آمدنی میں سے بغداد بھی حصہ لے گا لیکن کردستان نے معاہدے کے صرف پچاس فیصد حصے پر عمل کیا ہے جس کے باعث عراقی حکومت کو بجٹ خسارے کا سامنا ہے-