SAHAR

داعش دہشت گرد گروہ نے اپنے احکامات کی نافرمانی کرنے کے الزام میں دسیوں عراقی شہریوں کو قتل کر دیا ہے

ایشیا نیوز ایجنسی کی رپورٹ کے مطابق موصل میں کردستان ڈیموکریٹک پارٹی کے شعبہ اطلاعات کے سربراہ سعید مموزینی نے کہا ہے کہ داعش دہشت گرد گروہ نے منگل کو شہر موصل کے باب الطوال علاقے میں دس عام شہریوں کو ان کے اہل خانہ کے سامنے قتل کر دیا-

 کردستان ڈیموکریٹک پارٹی کے رہنما نے موصل میں داعش دہشت گرد گروہ کی بڑھتی ہوئی مخالفت کی جانب اشارہ کرتے ہوئے کہا کہ یہ تکفیری گروہ، مخالفین کو قتل کرکے عوام کے درمیان خوف و وحشت پیدا کرنا چاہتا ہے -

مغربی عراق کے صوبہ الانبار کے ایک مقامی ذریعے نے کہا ہے کہ داعش دہشت گرد گروہ نے تین عام شہریوں اور انتخابی کمیشن کے دو سابقہ ارکان کو عراقی سیکورٹی اہلکاروں کے ساتھ تعاون کرنے اور عراقی فضائیہ کو داعش کے خفیہ ٹھکانے کی اطلاع دینے کے الزام میں فلوجہ کے ایک مرکزی چوراہے پر قتل کر دیا-

صوبہ صلاح الدین کے تکریت شہر کے ایک سیکورٹی ذریعے نے بھی کہا ہے کہ تکفیری دہشت گردوں نے چار دیگر افراد کو الشرقاط کے مضافاتی علاقے میں سیکورٹی اہلکاروں کے ساتھ انٹیلیجنس تعاون کرنے کے الزام میں پھانسی دے دی ہے-

داعش دہشت گرد گروہ نے عام مقامات پر عراقی جوانوں کو پھانسی دینے کے بعد ان کے اہل خانہ کو ان کی لاشیں بھی دفن کرنے کی اجازت نہیں دی-

 عراق کے وزیردفاع خالد العبیدی کے بقول، داعش تکفیری دہشت گرد، صوبہ نینوا پر قبضے کے بعد سے اب تک اس شہر کے دو ہزار ستر شہریوں کو اپنے ساتھ تعاون نہ کرنے کے الزام میں قتل کر چکے ہیں-