SAHAR

عراق میں انسداد دہشت گردی کےادارے نے کہا ہے کہ مغربی صوبے الانبار کے صدرمقام الرمادی کو دہشت گردوں کے قبضے سے آزاد کرانے کے لئے فوجی کارروائی پھرسے شروع کردی گئی ہے

عراق میں انسداد دہشت گردی کے ادارے کی آپریشنل کمان کے نائب سربراہ عبدالامیرالخزرجی نے اتوار کو اپنے ایک بیان میں کہا ہے کہ الرمادی شہرکو دہشت گردوں کےقبضے سے آزاد کرانے کی کارروائی جو موسمی حالات کے سبب مختصر عرصے کے لئے روک دی گئی تھی دوبارہ شروع کردی گئی ہے- ان کا کہنا تھا کہ عراقی فورس چاروں طرف سے خاص طورپرشہر کے مغرب کی جانب سے اس کے بہت قریب پہنچ گئی ہے-

خبروں میں بتایا گیا ہے کہ عراق کی خصوصی فورس نے اس وقت الرمادی کے بعض علاقوں منجملہ شمال کے علاقے الشراع کو داعش کے قبضے سے آزاد کرالیا ہے-

واضح رہے کہ الانبار میں فوجی آپریشن کے سربراہ اسماعیل المحلاوی نے جمعے کو کہا تھا کہ خراب موسم اور شدید سیلاب کے باعث الرمادی کو دہشت گردوں کے قبضے سے آزاد کرانے کی کارروائی وقتی طور پرروک دی گئی ہے-

ادھر عراق کی فیڈرل پولیس کےسربراہ رائد شاکر جودت نے کہا ہے کہ صوبہ صلاح الدین کے اہم شہر بیجی کو آزاد کرانے کی کارروائی میں فیڈرل پولیس نے پہلی بارحصہ لیا تھا اور اس کارروائی کے دوران بیجی کے آس پاس کے دوسوچار گاؤں اور قصبے دہشت گردوں کے قبضے سے آزاد کرالئے گئے جس کے دوران سیکڑوں دہشت گردوں کو موت کے گھاٹ اتاردیا گیا -