یمنی فوج نے درجنوں سعودی فوجیوں کو گرفتار کرلیا
یمن کی فوج اور عوامی رضاکار فورس کے جوانوں نے درجنوں سعودی فوجیوں کو گرفتار کرلیا ہے۔
المسیرہ ٹی وی نے عسکری ذرائع کے حوالے سے بتایا ہے کہ یمنی فوج نے، صوبہ مارب میں ایک کارروائی کے دوران درجنوں سعودی فوجیوں کو ہلاک کرنے کے علاوہ سو کے قریب سعودی فوجیوں کو گرفتار بھی کرلیا ہے۔
سعودی حکومت نے ان فوجیوں کو صوبہ مارب میں اپنی فوجی پوزیشن کو مضبوط بنانے کی غرض سے اس علاقے میں بھیجا تھا۔
یمنی فوج نے صوبہ مارب کے مغربی علاقے میں بھی علیحدہ کارروائی کے دوران سعودی فوج کی متعدد گاڑیوں کو تباہ کردیا ہے جس کے نتیجے میں اس میں سوار تمام سعودی فوجی ہلاک ہوگئے ہیں۔
ایک اور اطلاع کے مطابق یمنی فوج نے صحن الجن فوجی چھاونی کو اپنے حملوں کا نشانہ بنایا ہے جس میں درجنوں سعودی فوجی مارے گئے ہیں۔
دوسری جانب سعودی حکومت کے لڑاکا طیاروں نے دارالحکومت صنعا کے مغربی نواحی علاقے بنی یوسف پر بمباری کی ہے جس میں کم سے کم نو عام شہری شہید اور بیس دیگر زخمی ہوگئے۔
چھبیس مارچ سے جاری سعودی اتحاد کے حملوں میں ہزاروں بے گناہ یمنی شہری شہید اور زخمی ہوچکے ہیں جبکہ اس عرب اور اسلامی ملک کی اسّی فی صد بنیادی تنصیبات تباہ ہوگئی ہیں۔
