SAHAR

شام کے وزیر خارجہ ولید معلم نے اقوام متحدہ کے نام ایک خط میں ترکی پر الزام عائد کیا ہے کہ وہ حلب کے مضافات میں واقع پرامن علاقوں میں عام شہریوں پر دہشت گردوں کے حملوں میں ان کا ساتھ دے رہا ہے۔

فارس خبر رساں ایجنسی کی رپورٹ کے مطابق شام کے وزیر خارجہ ولید معلم نے اقوام متحدہ کے سیکرٹری جنرل اور سلامتی کونسل کے سربراہ کے نام خط ارسال کیا ہے جس میں حلب کے مضافات میں واقع پرامن علاقوں پر دہشت گردوں کے حملوں پر تنقید کی گئی ہے۔

شام کے وزیر خارجہ نے اس خط میں ترکی کی حکومت پر الزام لگایا ہے کہ وہ ان حملوں میں دہشت گردوں کو مدد فراہم کر رہی ہے۔ واضح رہے کہ حلب کے مضافات میں واقع پرامن علاقوں پر جمعے کے دن سے ہونے والے دہشت گردانہ حملوں میں کم از کم ایک سو دس عام شہری جاں بحق ہو چکے ہیں۔