SAHAR

یمن کی تحریک انصاراللہ کے سیکریٹری جنرل نے کہا ہے کہ سعودی عرب، یمن کے عوام کے خلاف جنگ مسلط کرکے اپنے اہداف حاصل نہیں کرسکا-

ارنا کی رپورٹ کے مطابق یمن کی تحریک انصاراللہ کے سیکریٹری جنرل عبدالملک الحوثی نے یمنی عوام کے خلاف سعودی عرب اور اس کے اتحادیوں کے جاری حملوں کا ذکر کرتے ہوئے کہا ہے کہ سعودی عرب اور اس کے ایجنٹ اس کوشش میں ہیں کہ انہیں یمن کے خلاف جنگ کے ذریعے جو مقصد حاصل نہیں ہوا ہے اسے وہ مذاکرات کے ذریعے حاصل کریں-

عبدالملک الحوثی نے یمن کے بحران کے حل پر تاکید کرتے ہوئے کہا  کہ سعودی عرب کی جارح افواج عوامی تحریک کو اپنے منصوبوں کو آگے بڑھانے کی راہ میں رکاوٹ اور ان منصوبوں کو ناکام بنانے کا عامل سمجھ رہی ہیں جبکہ انقلابی فورسز نے ہر طرح سے عرب اور اسلامی ملکوں کے سامنے اپنی نیک نیتی کا اظہار کردیا ہے-

یمن کی تحریک انصاراللہ کے سیکریٹری جنرل نے انقلابی کمیٹی کی کارکردگی کی جانب اشارہ کرتے ہوئے کہا کہ اس کمیٹی نے یمن کا شیرازہ بکھرنے نہیں دیا اور وہ یمنی عوام کے خلاف سعودیوں کی جارحیت سے مقابلے کو ترجیح دیتی ہے -

عبدالملک الحوثی نے مزید کہا کہ یمن کی تحریک انصاراللہ کی کوشش  ہے کہ وہ یمنی عوام کو اندرون ملک ظلم  و استبداد اور بیرونی تسلط سے رہائی دلائے-