ہم غیر ملکی فوجیوں کو عراق میں جنگ کی اجازت نہیں دیں گے: عمار حکیم
-
عراق کی مجلس اعلائے اسلامی کے سربراہ عمار حکیم کی اسلامی جمہوریہ ایران کی عدلیہ کے سربراہ آیۃ اللہ آملی لاریجانی کے ساتھ ملاقات
عراق کی مجلس اعلائے اسلامی کے سربراہ نے کہا ہے کہ داعش دہشت گرد گروہ کے خلاف جنگ کے لئے عراقی عوام مزید متحد ہوگئے ہیں اور ہم کسی بھی غیر ملکی فوجی کو عراق میں جنگ کی اجازت نہیں دیں گے-
پارس ٹوڈے کی رپورٹ کے مطابق عراق کی مجلس اعلائے اسلامی کے سربراہ عمار حکیم نے اسلامی جمہوریہ ایران کی عدلیہ کے سربراہ آیۃ اللہ آملی لاریجانی کے ساتھ ملاقات میں، جو اس وقت عراق کے دورے پر ہیں، کہا کہ تمام عراقی اپنے ملک کے اقتدار اعلی اور ارضی سالمیت کے تحفظ پر متحد و متفق ہیں اور وہ تن تنہا اپنی سرزمینوں کو آزاد کرانے پر قادر ہیں-
عمار حکیم نے کہا کہ عراقی فوج عنقریب ہی صوبہ نینوا میں داعش کے عناصر کو نابود کردے گی اور موصل کو آزاد کرانے کے ساتھ ہی، پورا عراق داعش کے ناپاک وجود سے پاک ہوجائے گا-
قابل ذکر ہے کہ ترکی نے بارہا اپنا یہ فیصلہ سنایا ہے کہ وہ موصل کو آزاد کرانے کی کارروائی میں شامل ہوگا تاہم عراقی حکام نے ترکی کے اس فیصلے پر اپنی مخالفت کا اعلان کیا ہے-
ایران کی عدلیہ کے سربراہ آیۃ اللہ آملی لاریجانی، عراق کے اعلی حکام سے ملاقات سے کے لئے ہفتے کے روزعراق کے دارالحکومت بغداد گئے تھے اور پیر کی شام کو نجف اشرف پہنچے-
