فلسطین، اسرائیل کے مفاد پر حملے تیز ہوئے
فلسطین میں جہاں ایک طرف مغربی کنارے میں اسرائیلی بسوں پر فائرنگ کی گئی ہے وہیں دوسری جانب صیہونی فوجیوں کی جانب سے فلسطینیوں پر حملہ کیا گیا ہے جس کے بعد جھڑپیں ہوئی ہیں۔
سحر نیوز/ عالم اسلام: اسرائیلی ذرائع نے میڈیا رپورٹس کے حوالے سے بتایا ہے کہ مغربی کنارے کے شہر نابلس کے جنوب میں اسرائیلیوں کو لے جانے والی بس پر فلسطینی مجاہدین نے حملہ کر دیا۔ اس واقعہ میں کوئی ہلاک نہیں ہوا لیکن اسرائیل میں شدید خوف و ہراس پھیل گیا۔
فلسطینی ذرائع نے بتایا کہ جنین شہر کے مغرب میں یعبد شہر کے قریب فلسطینی مزاحمت کاروں اور مجاہدین نے اسرائیلی فوجیوں پر فائرنگ کی جبکہ رام اللہ میں صیہونی فوجیوں نے دو گھروں کو گھیرے میں لے کر ان پر فائرنگ کی ۔
صہیونیوں کا کہنا ہے کہ فلسطینی مزاحمت کار ان دو گھروں میں پناہ لیے ہوئے ہیں۔ دریں اثناء تحریک حماس کے سیاسی شعبے کے سربراہ نے منگل کو ایک فلسطینی بچی سے ملاقات کی جو حالیہ غزہ جنگ میں اپنے بازو اور ٹانگوں سے محروم ہو گئی تھی۔
رحف سلیمان نامی لڑکی تین روزہ غزہ جنگ کے دوران صیہونی افواج کے فضائی حملوں میں اپنی دونوں ٹانگیں اور ایک بازو کھو بیٹھی۔ ترکی کے دارالحکومت انقرہ کے ایک اسپتال میں ایک فلسطینی لڑکی زیر علاج ہے۔ اس جنگ میں اسرائیل نے کئی فلسطینی بچوں کو شہید کیا۔
