مقبوضہ فلسطین میں صیہونیوں کا حملہ، کئی افراد شہید اور زخمی
جنین کے قریبی علاقے قباطیہ میں صیہونی فوج حملہ کرکے دو فلسطینیوں کو شہید اورتین کو زخمی کردیا ہے۔
سحرنیوز/عالم اسلام: فلسطینی مقامی ذرائع کی رپورٹ کےمطابق صیہونی فوج کے خصوصی دستوں نے قباطیہ کے علاقے میں حملے کرکے چند فلسطینی جوانوں کو گرفتار کر لیا، یہ فوجی سول لباس میں تھے۔
گرفتاری کے بعد جب فلسطینیوں کو ان کا پتہ چلا تو ان صیہونی فوجیوں نے نہتے فلسطینیوں کی جانب فائرنگ شروع کردی جس سے پانچ افراد زخمی ہوگئے۔
رپورٹ کے مطابق زخمی فلسطینیوں کو ہسپتال منتقل کیا گیا لیکن زخموں کی تاب نہ لا کر دو فلسطینی ہسپتال میں شہید ہوگئے۔
فلسطینی وزارت صحت کے اعلان کے مطابق ایک پچیس سالہ جوان حبیب محمدعبدالرحمان کمیل جسے سر پر چوٹیں آئی تھیں، زخموں کی شدت سے شہید ہوگیا۔
اس وزرات خانہ نے ایک اٹھارہ سالہ فلسطینی جوان عبدالہادی نزال کی شہادت کی خبر بھی دی ہے جسے صیہونی فوج نے سر میں گولی مار کر شہید کر دیا تھا۔
یاد رہے کہ صیہونی فوج کے مظالم سے گزشتہ 48 گھنٹوں میں پانچ فلسطینی شہید ہوچکےہیں۔
