غرب اردن میں طولکرم کیمپ پر صیہونی فوجیوں کے حملے میں 3 فلسطینی شہید
صیہونی فوجیوں نے غرب اردن میں طولکرم کیمپ پر حملہ کر کے تین فلسطینیوں کو شہید کردیا۔
سحرنیوز/عالم اسلام: فلسطین کی وزارت صحت نے طولکرم پر صیہونی فوجیوں کی یلغار میں تین فلسطینیوں کی شہادت اور ایک فلسطینی کا گھر، محاصرے میں لے لئے جانے کی خبر دی ہے۔ فلسطین کی ہلال احمر کمیٹی نے اعلان کیا ہے کہ امدادی گاڑیاں اس علاقے میں پہنچنے کی کوشش کر رہی ہیں جہاں جھڑپیں ہو رہی ہیں۔
غاصب صیہونی فوجی، آج صبح مغرب کی جانب سے طولکرم کالونی میں داخل ہوگئے اور الاسراء اور ثابت ثابت اسپتالوں کا محاصرہ کر لیا۔ طولکرم کیمپ میں غاصب اسرائیلی فوجیوں کی کارروائيوں کا سلسلہ جاری ہے۔ فلسطینی شہریوں کے مال اسباب اور بنیادی ڈھانچوں کو کافی نقصان پہنچا ہے۔
صیہونی فوجیوں نے جمعرات کی صبح بھی مشرقی طولکرم کے اکتابا علاقے میں ایک گھر کا محاصرہ کر لیا اور نابلس روڈ پر غاصب فوجی تعینات ہوگئے ہيں۔ فلسطینی مجاہدین نے صیہونی فوجیوں کے اس اقدام کے خلاف ان کا مقابلہ کیا اور صیہونی فوج کے بلڈوزروں اور گاڑیوں کے سامنے دستی بم کے متعدد دھماکے کئے۔ صیہونی میڈیا نے اعتراف کیا ہے کہ ایک غاصب صیہونی فوجی طولکرم میں گرینڈ بم کے دھماکے میں زخمی ہوگیا ہے جبکہ ایک بلڈوزر میں آگ لگ گئی ہے۔
