صیہونی جارحیت شام کی خودمختاری کی کھلی خلاف ورزی ہے : او آئی سی
اسلامی تعاون تنظیم نے دمشق کے نواحی علاقے بیت جن پر حالیہ صیہونی حملے کی شدید الفاظ میں مذمت کرتے ہوئے اسے شام کی خود مختاری کی صریح خلاف ورزی اور علاقائی استحکام کے لئے سنگین خطرہ قرار دیا ہے۔
سحرنیوز/عالم اسلام: اسلامی تعاون تنظیم (او آئی سی) نے سنیچر کے روز ایک بیان جاری کیا ہے جس میں دمشق کے نواحی علاقے بیت جن پر صیہونی فوج کے حملے کی شدید الفاظ میں مذمت کی ہے۔بیان میں کہا گیا ہے کہ صیہونی حکومت کی جانب سے مسلسل جارحیت شام کی خودمختاری کی صریح خلاف ورزی، عدم استحکام، بدامنی پیدا کرنے اور ملک کے امن کو درہم برہم کرنے کی کوشش ہے۔
تنظیم نے اس بات پر زور دیا ہے کہ اس طرح کے اقدامات خطے میں سلامتی اور استحکام کو برقرار رکھنے کی کوششوں کو نقصان پہنچاتے ہیں اور اس حملے کے نتائج کی تمام تر ذمہ داری صیہونی حکومت پر عائد ہوتی ہے۔او آئی سی نے عالمی برادری سے بھی مطالبہ کیا کہ وہ ان حملوں کو روکنے، بین الاقوامی قراردادوں پر عمل درآمدکرنے اور شام کی خودمختاری اور علاقائی سالمیت کے تحفظ کے لئے فوری کارروائی کریں۔
ہمیں فالو کریں:
Follow us: Facebook, X, instagram, tiktok
او آئی سی نے عالمی برادری سے مزید سنجیدہ کوششیں انجام دینے پر زور دیا تاکہ اس طرح کی جارحیت کی تکرار کو روکا جا سکے اور علاقائی سلامتی اور استحکام کی حمایت کی جا سکے۔
مقامی ذرائع کے مطابق صیہونی فوج نے جمعہ کو بیت جن کے علاقے پر حملے میں توپخانے اور ڈرون کا استعمال کیا تھا جس کے نتیجے میں کم از کم تیرہ افراد مارے گئے اور متعدد افراد زخمی ہوئے-
