اسرائیل نے غزہ کے شہدا کے اعداد و شمار تسلیم کر لیے : حماس

Jan ۳۰, ۲۰۲۶ ۱۹:۰۷ Asia/Tehran

فلسطین کی اسلامی مزاحمتی تحریک حماس کے رہنما باسم نعیم نے کہا ہے کہ صہیونی قابض فوج نے بالآخر غزہ میں وزارت صحت کے اعداد و شمار کو تسلیم کر لیا ہے۔ ان کے مطابق جنگ کے آغاز سے اب تک تقریباً ستر ہزار فلسطینی شہید ہو چکے ہیں۔

سحرنیوز/عالم اسلام: العالم کی رپورٹ کے مطابق انہوں نے واضح کیا کہ قابض فوج نے یہ بھی مانا ہے کہ یہ تعداد ان لاپتا افراد کو شامل نہیں کرتی جو اب بھی ملبے تلے دبے ہوئے ہیں۔ وزارت صحت کے مستند اعداد و شمار کے مطابق، براہ راست صہیونی فوجی حملوں میں شہید ہونے والوں کی درست تعداد ستر ہزار چھ سو سڑسٹھ تک پہنچ چکی ہے۔

باسم نعیم نے عالمی میڈیا پر شدید تنقید کرتے ہوئے کہا کہ غزہ میں جاری جنگ اور نسل کشی کے دوران مغربی میڈیا اداروں، جن میں بی بی سی، سی این این، نیویارک ٹائمز اور فاکس نیوز شامل ہیں، نے اندھا دھند صہیونی بیانیے کی حمایت کی، حالانکہ وزارتِ صحت کے اعداد و شمار کو اقوام متحدہ اور بین الاقوامی ادارے بارہا درست قرار دے چکے تھے۔

ہمیں فالو کریں:

آخر میں انہوں نے مطالبہ کیا کہ یہ میڈیا ادارے اپنی غلط رپورٹنگ پر کھلے عام معافی مانگیں، فلسطینیوں کے حق میں مؤقف اپنانے پر نکالے گئے صحافیوں کو بحال کریں، اور آزادی، انسانی وقار اور انسانی حقوق سے متعلق اپنے دعوؤں پر سنجیدہ نظرِ ثانی کریں۔