SAHAR

رپورٹ کے مطابق عمان کی وزارت خارجہ نے مسقط میں متعین بحرین کے ناظم الامور کو طلب کیا اور صنعا میں عمان کے سفیر کی رہائش گاہ پر سعودی عرب کے اتحادیوں کے حملے کے سلسلے میں ایک احتجاجی یادداشت ان کو پیش کی گئی-

عمان نے اس سے پہلے مسقط میں متعین سعودی عرب کے سفیر کو بھی وزارت خارجہ میں طلب کرکے ان کو صنعا میں عمان کے سفیر کی رہائش گاہ پر ہونے والے سعودی اتحاد کے حملے سے متعلق عمان کے احتجاج سے آگاہ کیا تھا- واضح رہے کہ گزشتہ جمعہ کو سعودی عرب کی سرکردگی میں عرب اتحاد کے جارح لڑاکا طیاروں نے یمن کے دارالحکومت صنعا میں عمان کے سفیر کی رہائش گاہ پر میزائل حملہ کیا تھا-

عمان نے صنعا میں عمان کے سفیر کی رہائش گاہ پر جارحین کے حملے کی مذمت بھی کی تھی اور اس حملے کو بین الاقوامی قوانین کی کھلی خلاف ورزی قرار دیا تھا- عمان علاقے کا واحد عرب ملک ہے کہ جس نے یمن پر سعودی عرب کے حملے میں اس کا ساتھ نہیں دیا ہے-