پاکستان کا امریکہ سے ڈکٹیشن نہ لینے کا اعلان
پاکستان نے کہا ہے کہ اگر امریکی ڈکٹیشن دینے آ رہے ہیں تو ہم ان کی ڈکٹیشن نہیں لیں گے ۔
پاکستان کے وزیرخارجہ خواجہ آصف نے امریکا کے حوالے سے آئندہ پالیسی پر کہا کہ امریکی وزیر خارجہ اور وزیر دفاع دورہ پاکستان میں اگر ہمیں ڈکٹیشن دینے آ رہے ہیں تو ہم ان کی ڈکٹیشن نہیں لیں گے اور اب ہم وہ کریں گے جو ہمارے وطن کے مفاد میں ہو گا۔
پاکستان کے وزیرخارجہ کا کہنا تھا کہ پاکستان نے امریکی عہدیداروں کو پیشکش کی ہے کہ حقانی نیٹ ورک کے جتنے ٹھکانوں کا پتہ ان کے پاس ہیں وہ لے کر ہیلی کاپٹر پر بیٹھ کر ہمارے ساتھ ان علاقوں کا اچانک دورہ کرلیں اورحقانی نیٹ ورک کی کوئی سرگرمی دکھائی دے تو پاکستان اورامریکا مل کر ان عناصر کو وہیں ملیا میٹ کر دیں گے۔
امریکا کے ساتھ تعلقات خراب ہونے پر ان کا کہنا تھا کہ پاکستان تنہا نہیں امریکا جو چار آنے ہمیں دے رہا ہے وہ بھی بند کردے تو ہم گزارہ کر لیں گے جب کہ اگر امریکی دباو آیا تو چین، روس، ایران اور ترکی ہمارے ساتھ کھڑے ہوں گے۔
واضح رہے پاکستانی وزیرخارجہ کا یہ بیان ان کے حالیہ دورہ امریکا کے بعد سامنے آیا جہاں انہوں نے امریکی وزیر خارجہ ریکس ٹیلرسن سے بھی ملاقات کی تاہم اس ملاقات کے باوجود دونوں ممالک کے اختلافات کم نہیں ہوئے۔
