شیعہ ہزارہ برادری لشکرجھنگوی اورداعش کے نشانے پر
کوئٹہ میں شیعہ مسلمانوں کی ٹارگٹ کلنگ کی اس ملک کی سیاسی اورمذہبی جماعتوں نے شدید الفاظ میں مذمت کی۔
مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری نے کاسی روڈ کوئٹہ پر شیعہ ٹارگٹ کلنگ کے نتیجے میں پانچ قیمتی انسانی جانوں کے ضیاع پر گہرے غم و غصے کا اظہار کرتے ہوئے کہا ہے کہ کوئٹہ میں شیعہ ہزارہ برادری کالعدم دہشتگرد تکفیری گروہ لشکر جھنگوی اور داعش کے نشانے پر ہے۔
علامہ راجہ ناصرعباس جعفری نے کہا کہ صوبہ بلوچستان کو عدم استحکام سے دوچار کرنے کے لیے ملک دشمن قوتیں کالعدم مذہبی جماعتوں کو آلہ کار کے طور پر استعمال کررہی ہیں۔ دہشت گردی کے خلاف جاری جنگ کے سو فیصد نتائج اس وقت تک حاصل نہیں ہو سکتے جب تک ان کالعدم جماعتوں کے سرغنوں کو گرفتار نہ کیا جائے۔
مجلس وحدت مسلمین کے سیکرٹری جنرل کا کہنا تھا کہ ان سازشوں کو ناکام بنانے کے لیے بلوچستان میں شر پسند عناصر کے گرد قانون کا شنکجہ سخت کرنا ہو گا اس لئے کہ بلوچستان میں دہشت گردی کے واقعات پاکستان میں دہشت گردوں کی موجودگی کے تاثر کو تقویت فراہم کریں گے جو عالمی سطح پر پاکستان کے ساکھ کے لیے سخت نقصان دہ ہے۔انہوں نے کہا دہشت گردی کی جنگ کا رُخ بلاتاخیر کالعدم مذہبی جماعتوں کے رہنماؤں کی طرف موڑا جائے۔
واضح رہے کہ کل کوئٹہ کے کاسی روڈ پر تکفیری دہشتگردوں نے ایک گاڑی پرفائرنگ کی جس کے نتیجے میں 5 افراد شہید ہوگئے۔ واقعہ کے خلاف شیعہ مسلمانوں نے احتجاج کیا، دھرنا دیا اور حکومت اور تکفیری دہشتگردوں کے خلاف نعرے لگائے جبکہ یہ احتجاج اور دھرنا صوبائی وزیر داخلہ سرفراز بگٹی کی دہشتگردوں کے خلاف آپریشن کرنے کی یقین دہانی اور مطالبات تسلیم ہونے کے بعد ختم ہو گیا۔