عرب کلچر، پاکستان میں متعارف نہیں کروا سکتے کیونکہ وہ اسلامی نہیں: رضا ربانی
Nov ۰۴, ۲۰۱۷ ۱۲:۱۱ Asia/Tehran
پاکستانی سینیٹ کے چیئرمین رضا ربانی نے کہا ہے کہ عرب کلچراسلامی نہیں ہے۔
کراچی میں تقریب سے خطاب کرتے ہوئے پاکستانی سینیٹ کے چیئرمین رضا ربانی نے کہا کہ عرب کلچر پاکستان میں متعارف نہیں کرواسکتے کیوں کہ وہ اسلامی نہیں، ہمارے اسکولوں میں پاکستانی تاریخ ٹھیک انداز سے نہیں پڑھائی جاتی اور نصاب میں بچوں کو جہاد کی ترغیب دی جاتی ہے۔
پاکستان کے چیئرمین سینیٹ نے کہا کہ موجودہ حالات میں کچھ بھی ٹھیک نہیں ہورہا، میرا دل خون کے آنسو روتا ہے جب غیر آئینی عمل کی بات سنتا ہوں، ہمیں یہ طے کرنا ہوگا کہ پارلیمنٹ سپریم ہے یا کوئی اور، ضرورت اس بات کی ہے کہ ایک دوسرے کے کاموں میں غیر آئینی مداخلت نہ کی جائے۔
رضا ربانی کا کہنا تھا کہ ڈکٹیٹر مشرف کے دور میں صوبوں کے بجٹ میں کٹوتی کی گئی جب کہ قائد اعظم کے 14 نکات میں سے 4 نکات صرف صوبائی خودمختاری پر ہیں۔
