ایران اور پاکستان کے درمیان تجارت کے فروغ پر زور
پاکستان اور ایران کے درمیان سالانہ تجارت 8 ارب ڈالر تک پہنچنے کا ہدف مقرر کر لیا گیا۔
سحرنیوز/پاکستان: پاکستانی وفاقی وزیر برائے تجارت جام کمال اور ایران کے وزیر صنعت، کان اور تجارت محمد اتابک کی اسلام آباد میں ملاقات ہوئی جس میں دوطرفہ تجارت کو نئی جہت دینے پر اتفاق کیا گیا۔ جام کمال نے کہا کہ ایران کے ساتھ تجارتی تعلقات میں تیزی لانے کا وقت آ گیا ہے، جغرافیائی قربت کو تجارتی فائدے میں بدلنا وقت کی ضرورت ہے۔ پاکستان اور ایران کے وزرائے تجارت کا باہمی سرحدی تعاون بڑھانے پر زور دیا گیا جبکہ مشترکہ اقتصادی کمیشن کے آئندہ اجلاس کو تیز کرنے پر اتفاق کیا گیا۔
اس ملاقات میں ایرانی وزیر نے کہا کہ دونوں ممالک کے تاجروں کے درمیان اعتماد خوش آئند ہے۔ پاکستان اور ایران کے درمیان تجارتی راہداریوں کے بھرپور استعمال پر بھی زور دیا گیا۔ وزیر تجارت جام کمال خان نے کہا کہ پاکستان اور ایران کے درمیان برادرانہ تعلقات نئی بلندیوں کی جانب گامزن ہیں، پاک ایران دوستی تجارت، ثقافت اور بھائی چارے کا مظہر ہے۔ پاکستان اور ایران کے عوام تاریخی، ثقافتی اور لسانی رشتوں میں بندھے ہوئے ہیں۔ ایرانی وزیر نے کہا کہ برادرانہ تعلقات کو مضبوط بنانے کے لیے تجارتی تعاون ناگزیر ہے، دونوں ممالک کے درمیان قریبی روابط خطے میں استحکام کا باعث بنیں گے۔ پاکستان اور ایران کے تاجر ایک دوسرے پر مکمل اعتماد کرتے ہیں۔
