یومِ اقبال پر صدرِ مملکت اور وزیرِ اعظم کا خراجِ عقیدت
پاکستان کے صدرِ مملکت آصف علی زرداری اور وزیر اعظم شہباز شریف نے شاعر مشرق علامہ محمد اقبالؒ کے 148 ویں یومِ پیدائش پر انہیں زبردست خراج عقیدت پیش کیا ہے۔
سحرنیوز/پاکستان: پاکستان کے صدرِ مملکت نے اپنے پیغام میں کہا کہ علامہ محمد اقبالؒ نے برصغیر کے مسلمانوں میں آزادی کا شعور بیدار کیا، اقبالؒ کا پیغام آج بھی رہنمائی کا سرچشمہ ہے، 1930 کا خطبۂ الہ آباد مسلمانوں کی خودمختاری کی بنیاد بنا۔
آصف علی زرداری نے کہا کہ اقبالؒ نے امّت مسلمہ کی شناخت، روحانیت اور آزادی پر زور دیا، ان کے نظریات نے پاکستان کی قومی شناخت کی تشکیل کی، ہم اقبالؒ کے اصولوں پر عمل پیرا رہنے کے عزم کی تجدید کرتے ہیں۔
آصف علی زرداری نے کہا کہ پاکستان کو خوشحال، پُرامن اور متحد بنانے کے لیے ہم سب کو کردار ادا کرنا ہوگا، علامہ محمد اقبالؒ کا وژن آج بھی ہماری ترقی کی سمت متعین کرتا ہے، اقبالؒ کا فکری ورثہ آنے والی نسلوں کے لیے مشعلِ راہ رہے گا۔
علامہ اقبالؒ نے مایوسی کا شکار قوم کو خودی کا پیغام دیا،پاکستانی وزیراعظم
پاکستان کے وزیر اعظم شہباز شریف نے کہا کہ آج ہم شاعر مشرق، مفکر اسلام علامہ محمد اقبالؒ کو ان کے یوم پیدائش پر خراج عقیدت پیش کرتے ہیں، علامہ اقبالؒ نے غلامی کے اندھیروں میں روشنی کی شمع جلائی، انہوں نے مایوسی کا شکار قوم کو خودی کا پیغام دیا، اقبالؒ نےسبق دیا کہ ایمان اور علم و عمل کی بنیاد پرزندہ قوم اپنی تعمیرکرتی ہے۔
شہباز شریف نے کہا کہ آج بھی قومی اور عالمی حالات میں فکر اقبالؒ رہنمائی فراہم کرتی ہے، ان کا نوجوان ملت کا معمار اور مستقبل کا شاہین ہے، اقبالؒ کاخواب تھا کہ نوجوان اپنی تقدیر خود لکھیں، علامہ محمد اقبالؒ کا خواب تھا کہ نوجوان اپنی پرواز سے نئی دنیا پیدا کریں۔
شہباز شریف نے کہا کہ اسی فکرکےتحت حکومت نے اڑان پاکستان جیسے متعدد پروگرام شروع کیے، عالم اسلام کا اتحاد اور دنیا میں قیام امن مفکراسلام اقبالؒ کا خواب تھا، اقبالؒ امت مسلمہ کو ایک جسم کی مانند دیکھتے تھے۔
