پاپوا نیوگنی جیل سے 57 قیدی فرار، 17 ہلاک
پاپوا نیوگنی کی بوئیمو جیل توڑنے کی ایک بڑی کارروائی میں 57 قیدی فرار ہوگئے ہیں جبکہ جیل کے محافظوں نے 17 قیدیوں کو فائرنگ کر کے ہلاک اور درجنوں کو زخمی کردیا۔
بوئیمو جیل حکام کا کہنا ہے کہ فرار ہونے والے بیشتر قیدی سنگین جرائم میں ملوث تھے جن میں سے کئی کے خلاف مقدمات زیرِ سماعت تھے اور ان مفرور قیدیوں سے لوگوں کو شدید خطرات لاحق ہوسکتے ہیں۔
بوئیمو جیل پاپوا نیو گنی کے دوسرے بڑے شہر لائی میں واقع ہے جہاں پچھلے چند سال کے دوران جیل توڑنے کی کئی وارداتیں ہوچکی ہیں۔
گزشتہ برس ایسی ہی کارروائیوں میں کم از کم 70 قیدی فرار ہونے میں کامیاب ہوئے تاہم ان میں سے کم از کم 11 قیدیوں کو ہلاک کیا گیا تھا۔
پاپوا نیو گنی میں سست رفتار عدالتی کارروائی کے باعث جیلوں میں گنجائش سے زیادہ افراد قید ہیں جبکہ جیل محافظوں کی کم تعداد اور سیکیورٹی کے ناقص انتظامات کے نتیجے میں قیدیوں کا جیل توڑ کر فرار ہونا پاپوا نیو گنی میں معمول بن چکا ہے۔
