کاتالونیا کی حکومت برطرف، پارلیمنٹ تحلیل
اسپین کی حکومت نے آزادی کا اعلان کرنے والے نیم خودمختار علاقے کاتالونیا کی حکومت کو برطرف اور پارلیمنٹ کو تحلیل کردیا۔
غیرملکی میڈیا کے مطابق اسپین کے وزیراعظم ماریانو راجاؤے نے کاتالونیا کی علاقائی پارلیمنٹ کی جانب سے آزادی کے اعلان کے کچھ ہی دیربعد وہاں کی حکومت کو برطرف اور پارلیمنٹ کو تحلیل کردیا جب کہ 21 دسمبر کو قبل از وقت انتخابات کرانے کا اعلان کیا ہے۔
ٹی وی پر قوم سے خطاب کرتے ہوئے وزیر اعظم ماریانو راجاؤے نے کہا کہ کسی کو یہ حق نہیں کہ وہ قانون سے بالاتر ہوکر فیصلہ کرے، حالات کو معمول پرلانے کے لیے کاتالونیا پر براہ راست وفاق کا اقتدار نافذ کرنا ضروری ہے۔
ہسپانوی وزیراعظم نے کاتالونیا حکومت کے سربراہ کارلیس پوگیمونٹ اور ان کی کابینہ کو فارغ کرتے ہوئے پولیس کے ڈائریکٹر جنرل کو بھی معطل کر دیا۔
کاتالونیا کی پارلیمنٹ نے اسپین سے آزادی کااعلان کیاتھا جس کے بعد ہسپانوی سینیٹ نےآرٹیکل 155کی منظوری دی تھی جس کے تحت اسپین کو کاتالونیا کے رہنماؤں کو برخاست کرنے اور پولیس اور معیشت سمیت دیگر شعبوں پر مکمل کنٹرول کااختیار ہے۔
واضح رہے کہ گزشتہ روز کاتالونیا کی پارلیمنٹ نے رائے شماری کے بعد اسپین سے آزادی کا اعلان کر دیا تھا اور 70رکنی پارلیمنٹ میں صرف 10ارکان نے علیحدگی کی مخالفت جب کہ 2ارکان نے ووٹنگ میں حصہ نہیں لیا تھا۔
