SAHAR

 بیجنگ میں چینی حکام نے بتایا ہے کہ کورونا وائرس کے مرکز، ہوبے  میں مزید دو افراد کی موت واقع ہوئی جبکہ چھے افراد کے بارے میں شبہ ہے کہ وہ کورونا وائرس میں مبتلا ہو سکتے ہیں۔ چین کے نیشنل ہیلتھ کمیشن کے مطابق کورونا میں مبتلا اٹھارہ ہزار ایک سو اکیس افراد کی حالت انتہائی تشویشناک ہو گئی ہے۔ رپورٹ کے مطابق اب تک بیرون ملک سے آنے والے افراد میں سے ایک ہزار تین سو اٹھاسی کورونا میں مبتلا پائے گئے ہیں جن میں سے اڑتیس کی حالت تشویشناک ہے۔ 

متعلقہ چینی حکام کا کہنا ہے کہ پچھلے چوبیس گھنٹے کے دوران ایسے سولہ افراد کا پتہ لگایا گیا ہے جن میں کورونا کی کوئی علامات نہیں تھیں تاہم وہ کورونا مبتلا پائے گئے۔

اعداد و شمار کے مطابق چین میں اب تک چھیاسی ہزار ایک سو ساٹھ افراد کورونا میں مبتلا ہو چکے ہیں جن میں سے تین ہزار تین سو اکتالیس افراد کو اپنی جان سے ہاتھ دھونا پڑا ہے۔ 

 دوسری جانب جنوبی کوریا میں کورونا میں پچیس نئے کیس سامنے آئے ہیں جس کے بعد اس ملک میں کورونا متاثرین کی تعداد دس ہزار پانچ سو سینتیس ہو گئی ہے۔