امریکی دھمکیوں پر روس کا سخت ردعمل
روس نے امریکہ کی تازہ دھمکیوں کا جواب دیتے ہوئےکہا ہے ان کا ملک یوکرین میں مطلوبہ اہداف کے حصول کے لیے پرعزم ہے
اپنے ایک ٹوئٹ میں روسی وزارت خارجہ کی ترجمان ماریا زاخارووا کا کہنا تھا کہ امریکی دھمکیوں کے بعد، یوکرین میں اپنے اہداف کی غرض سے روسیوں کا عزم اور بھی زیادہ مستحکم ہوگیا ہے۔
انہوں نےکہا کہ امریکہ سخت غلطی پر ہے اگر وہ سمجھتا ہے کہ پابندیوں کے ذریعے روس کو دبایا جاسکتا ہے۔ تو اس کی یہ بھول ہے ۔
روسی وزارت خارجہ کی ترجمان نے کہا کہ امریکہ ہرروز ہمارے خلاف نئی نئی پابندیاں عائد کر رہا ہے البتہ روس ان کا جواب دیتا ہے یا نہیں اس کا امریکہ سے کوئی تعلق نہیں۔
انہوں نے روس کے خلاف امریکی دھمکیوں کو غیر موثر قرار دیتے ہوئے کہا کہ پابندیوں کا الٹا نتیجہ برآمد ہوا ہے اور جو راستہ ہم نے اپنے لیے مقرر کیا ہے اس پر چلنے پر ہمارا عزم مزید مستحکم ہوگیا ہے۔
قابل ذکر ہے کہ امریکہ کی قومی سلامتی کی اسٹریٹیجک کونسل کے کوآرڈی نیٹر جان کربی نے یہ دعوی کرتے ہوئے کہ روس یوکرین کے بعض علاقوں کو ضم کرنے کا ارادہ رکھتا ہے دھمکی دی ہے کہ اگر ماسکو نے ایسا کیا تو اسے واشنگٹن کی جانب سے نئی پابندیوں کا سامنا کرنا پڑے گا۔
